Өнөөдрийн хөрөнгө оруулалт — маргаашийн боломж
Монголын Хөрөнгийн Биржид бүртгэлтэй Хаан Банк, Голомт Банк, Худалдаа Хөгжлийн Банк, Төрийн Банк, Хас Банк 2026 оны эхний хагас жилийн санхүүгийн тайлангаа танилцууллаа. Тайлангаас харахад банкны салбар нийт хөрөнгө, ашиг болон зээлийн багцаа үргэлжлүүлэн өсгөж байгаа нь Монголын эдийн засгийн идэвхжил өндөр хэвээр байгааг илтгэж байна.
---
Хөрөнгө болон ашиг өсөлтөө хадгаллаа
Нийт хөрөнгийн хэмжээгээр Хаан Банк 28.1 их наяд төгрөгөөр салбараа тэргүүлж, өмнөх оны мөн үеэс 31.2%-ийн өсөлт үзүүлжээ. Үүний араас Голомт Банк (+32.9%), Худалдаа Хөгжлийн Банк (+13.8%), Төрийн Банк (+28%), Хас Банк (+11.1%) өсөлттэй ажилласан байна.
---
Төрийн банкны ашиг өмнөх оны мөн үеэс 2 дахин өслөө.
Ашгийн хувьд Хаан Банк 357.2 тэрбум төгрөгийн цэвэр ашигтайгаар салбарын тэргүүлэгч хэвээр үлдэв. Харин Голомт болон Худалдаа Хөгжлийн Банкны ашиг өмнөх оны өндөр сууриас шалтгаалан буурсан бол Төрийн Банк ашигаа хоёр дахин өсгөж, хамгийн өндөр өсөлтийг үзүүлсэн нь онцлох үзүүлэлт боллоо.
---
Активын чанар тогтвортой хэвээр байна
Банкны салбарын хамгийн чухал эрсдэлийн үзүүлэлт болох чанаргүй зээлийн түвшин бүх банкуудад 5%-иас доогуур хадгалагдсан нь зээлийн багцын чанар тогтвортой байгааг харуулж байна.
Энэ нь Монголын эдийн засгийн өсөлт, өрхийн болон бизнесийн төлбөрийн чадвар харьцангуй сайн түвшинд хадгалагдаж байгааг илэрхийлж байна.
Зах зээлийн үнэлгээ бодит өсөлтийг бүрэн дагаж чадсангүй
Зах зээлийн үнэлгээгээр Хаан Банк 2.77 их наяд төгрөгөөр хамгийн өндөр үнэлгээтэй хэвээр байгаа бол Хас Банк (+48.8%) болон Хаан Банк (+35.8%) хамгийн өндөр өсөлт үзүүлжээ.
Харин Худалдаа Хөгжлийн Банк (-33.5%) болон Төрийн Банк (-3.9%)-ны зах зээлийн үнэлгээ буурсан нь хөрөнгө оруулагчид ирээдүйн өсөлтийн хүлээлтээ бууруулж байгаа харагдаж байна.
Санхүүгийн харьцаа үзүүлэлтүүд
ХААН Банк болон ХасБанк актив, өөрийн хөрөнгөө ашиглан ашиг бий болгох чадвараар бусдаас өндөр байна. Харин Худалдаа, хөгжлийн банкны ROA, ROE хамгийн бага байгаа нь ашигт ажиллагаа харьцангуй сул байгааг харуулж байна.
ХасБанк хамгийн өндөр үнэлгээтэй байгаа нь хөрөнгө оруулагчид тус банкны цаашдын өсөлтийг илүү өөдрөгөөр харж байгааг илэрхийлж байна. Харин Худалдаа, хөгжлийн банк болон Төрийн банкны үнэлгээ харьцангуй бага байгаа тул бусад банктай харьцуулахад хямд үнэлэгдэж байна.
---
Дүгнэлт
2026 оны эхний хагас жилийн тайлангаас харахад Монголын банкны салбарын нийт хөрөнгө үргэлжлэн өсөж, зээлийн багцын чанар тогтвортой түвшинд хадгалагдсан байна. Харин цэвэр ашгийн гүйцэтгэл банк бүрд харилцан адилгүй байгаа нь ашигт ажиллагаа, үйл ажиллагааны үр ашиг болон өмнөх оны суурь үзүүлэлтийн ялгаатай байдлыг илэрхийлж байна. 2026 оны II хагасын хувьцааны гүйцэтгэлд банк бүрийн ашигт ажиллагааг хадгалах чадвар болон зээлийн чанарын өөрчлөлт хамгийн гол нөлөөлөгч хүчин зүйл байх болно.
