Монложистикс Холдинг” ХК нь 2026 оны 4 дүгээр сарын 25-ны өдрийн хувьцаа эзэмшигчдийн ээлжит хурлаараа “Монложистикс Тракинг” ХХК-ийг өөртөө нэгтгэх шийдвэрийг баталлаа.

2025 оны онцлох үйл явдлууд:

• 2025 оны 10 дугаар сард Монложистикс Ворлдвайд ХХК Оюутолгойн зэсийн баяжмалыг төмөр замаар экспортлох тээврийн тендерт шалгарсан нь компанийн орлогын эх үүсвэрийг төрөлжүүлэх, урт хугацааны өсөлтийн суурь бүрдүүлэх эерэг үйл явдал боллоо.
• 2025 онд MSE:MLG хувьцаа I ангилалд шилжиж, хувьцааны хөрвөх чадвар, зах зээлийн оролцогчдын сонирхлыг нэмэгдүүлэхэд чиглэсэн хувьцаа эргүүлэн худалдан авах хөтөлбөр хэрэгжүүлсэн байна.

---

2025 оны онцлох санхүүгийн үзүүлэлтүүд:

Монложистикс Групп ХК-ийн борлуулалтын орлого 2025 онд 285.3 тэрбум төгрөг болж, өмнөх оны 294.4 тэрбум төгрөгөөс 3.1%-иар буурлаа.

Компанийн цэвэр ашиг 2025 онд 9.4 тэрбум төгрөг болж, өмнөх оны 10.3 тэрбум төгрөгөөс 9.2%-иар буурсан байна. Үүнд борлуулалтын орлого 3.1%-иар буурч, өртөг 235.2 тэрбум төгрөгөөс 257.6 тэрбум төгрөг болж өссөнөөр борлуулалтын ашиг 59.2 тэрбум төгрөгөөс 27.6 тэрбум төгрөг болж огцом буурсан нь голлон нөлөөлжээ. Мөн ерөнхий ба удирдлагын зардал 10.8 тэрбум төгрөгөөс 12.2 тэрбум төгрөг болж өссөн, зогсоосон үйл ажиллагаанаас 624.5 сая төгрөгийн алдагдал бүртгэгдсэн нь эцсийн цэвэр ашгийг бууруулах нэмэлт хүчин зүйл болсон байна.

Компанийн тайлбарласнаар энэхүү бууралтад томоохон гэрээт харилцагчийн тээвэрлэлтийн маршрут өөрчлөгдөж, ачаа тээвэр Монгол Улсаар бус Казахстан Улсаар дамжин хийгдэх болсон мөн тээврийн зах зээлд үнийн өрсөлдөөн эрчимжсэн, экспортын гол бүтээгдэхүүн болох нүүрсний үнэ буурснаас нэгж тээврийн орлого багассан, мөнгөний хатуу бодлогын нөлөөгөөр дотоодын хэрэглээ болон импортын урсгал саарсан нь нөлөөлсөн гэв.

---

2026 оны зорилт

• Үзүүлэлтээс харахад ашигт ажиллагаа боломжийн түвшинд байгаа ч цэвэр ашгийн маржин 3.3% байгаа нь зардлын дарамт өндөр хэвээр байгааг илтгэж байна. Гэсэн хэдий ч компанийн удирдлага 2026 онд ашгийн маржинг 4%-д хүргэх зорилт тавьж байгаагаа Хувьцаа эзэмшигчдийн хурлаар мэдэгдсэн.
  
  2026 оны бизнес төлөвлөгөөндөө эдийн засгийн өсөлтийг 6%, ам.долларын жилийн дундаж ханшийг 3,681 төгрөг (4.5%-ийн өсөлт), Монгол Улсын ложистикийн салбарын өсөлтийг 19% байхаар тус тус таамаглаж дотооддоо бүтээмжээ нэмэгдүүлж, зардлын өсөлтийг хязгаарлахын зэрэгцээ гадаад талдаа үйлчилгээний чанар, нэр төрлийг нэмэгдүүлэн, харилцагчдад үнэ цэн бий болгосон хамтын ажиллагааг өргөжүүлэх замаар өсөлтийг хангахаар төлөвлөж байна гэв.