Өнөөдрийн хөрөнгө оруулалт — маргаашийн боломж
Нийтлэлийн агуулга:
1. Ираны мөргөлдөөнөөс үүдэлтэй инфляц дэлхийн төв банкуудыг чангаруулах бодлого руу түлхэж байна
2. AI-тай холбогдолтой компаниудын хувьцаа унаж, Өмнөд Солонгосын зах зээл хүчтэй унав
3. АНУ-ын хөдөлмөрийн зах зээлийн хүчтэй үзүүлэлт ХНС-ийн бодлогын хүлээлтийг өөрчиллөө
1. Ираны мөргөлдөөнөөс үүдэлтэй инфляц дэлхийн төв банкуудыг чангаруулах бодлого руу түлхэж байна
Ойрхи Дорнод дахь Ираны асуудалтай холбоотой геополитикийн хурцадмал байдал дэлхийн эрчим хүчний үнийг өсгөж, инфляцын дарамтыг нэмэгдүүлэх гол хүчин зүйл болоод байна. Үүний улмаас олон улсын төв банкууд мөнгөний бодлогоо илүү хатууруулах шаардлагатай нөхцөл байдал үүсчээ.
Евро бүсийн хэрэглээний үнийн индекс 2023 оноос хойш анх удаа 3 хувийг давж, суурь инфляц ч мөн таамгаас өндөр гарсан байна. Зах зээлүүд Европын Төв Банк энэ пүрэв гарагт бодлогын хүүгээ дахин 0.25 нэгжээр нэмэгдүүлнэ гэж үзэж байгаа бөгөөд ингэснээр тус байгууллага G7 орнуудын дундах хамгийн хатуу бодлоготой төв банк болж магадгүй байна.
Инфляцын дарамт зөвхөн Европоор хязгаарлагдахгүй байгаа юм. Тайванийн хэрэглээний үнийн өсөлт төв банкны анхааруулах түвшин болох 2.2 хувийг давсан бол Энэтхэгийн Нөөцийн Банк (Төв банк) бодлогын хүүгээ 5.25 хувьд хэвээр үлдээсэн ч инфляцын эрсдэлийг онцлон тэмдэглэжээ.
Нөгөө талаас хөрөнгө оруулагчид дэлхийн хэмжээнд илүү өндөр хүүгийн орчин үргэлжилнэ гэж үзэж эхэлснээр Малайзын ринггит ханш сүүлийн таван сарын доод түвшинд хүрсэн байна.
Шинжээчдийн үзэж байгаагаар энэ долоо хоногт гарах АНУ-ын инфляцын тайлан дэлхийн бондын болон валютын зах зээлүүдэд томоохон хөдөлгөөн авчрах магадлалтай байна. Хэрэв инфляц хүлээлтээс өндөр гарвал томоохон төв банкуудын чангаруулах бодлого удаан үргэлжлэх эрсдэл нэмэгдэх юм.
Ираныг тойрсон зэвсэгт мөргөлдөөн: Өнгөрсөн амралтын өдрүүдэд Ирантай холбоотой мөргөлдөөн дахин хурцдаж, АНУ Ираны дрон болон радарын байгууламжуудад цохилт өгсний хариуд Иран бүс нутгийн байнууд руу пуужин, дроноор довтолсон байна. Мөн Иран болон АНУ харилцан цохилт солилцсоноор өмнө нь байгуулсан гал зогсоох тохиролцоо улам эмзэг болж, газрын тосны үнэ өсөж, дэлхийн зах зээлд инфляцын дарамт нэмэгдэх эрсдэл үүсээд байна.
2. AI-тай холбогдолтой компаниудын хувьцаа унаж, Өмнөд Солонгосын зах зээл хүчтэй унав
Хиймэл оюун ухаантай холбоотой хувьцааны өсөлтөөр тэргүүлж байсан Азийн зах зээлүүдэд хүчтэй засвар хөдөлгөөн эхэлж, Өмнөд Солонгосын хөрөнгийн зах зээл хамгийн их дарамтад орлоо.
Даваа гарагийн арилжааны үеэр KOSPI индекс ойролцоогоор 8.8% унаж, хэлбэлзэл огцом нэмэгдсэний улмаас арилжааг түр хугацаанд зогсоох арга хэмжээ авчээ. Samsung Electronics болон SK Hynix зэрэг технологийн аваргуудын хувьцаа хамгийн ихээр буурсан байна. Тус хоёр компани нь KOSPI индексийн ойролцоогоор 52%-ийг эзэлдэг бөгөөд AI-тай холбоотой уналтаас үүдэн өнгөрсөн 7 хоногт л гэхэд Өмнөд Солонгосын хувьцааны зах зээлээс хөрөнгө оруулагчид нийт $10 тэрбум гаруйг татсан байна.
Зах зээлийн энэхүү огцом уналтын гол шалтгаан нь Broadcom компанийн санхүүгийн үр дүн хөрөнгө оруулагчдын өндөр хүлээлтэд хүрээгүй явдал болон АНУ-ын хүчтэй хөдөлмөрийн тайлангаас үүдэлтэй хүүгийн өсөлтийн хүлээлттэй холбоотой юм.
Өнгөрсөн баасан гараг буюу 6 сарын 5-ны арилжаагаар Nasdaq 100 индекс 5%-иар унаж, Philadelphia Semiconductor индекс ойролцоогоор 10% уналт үзүүллээ.
Өмнөд Солонгосын зах зээл энэ оны эхнээс дэлхийн хамгийн өндөр өсөлттэй томоохон зах зээлүүдийн нэг байсан боловч AI салбарын хэт өндөр үнэлгээ эрсдэлийг нэмэгдүүлж байв.
Зөвхөн хувьцааны зах зээл төдийгүй бондын зах зээл ч дарамтад орсон байна. Bloomberg-ийн мэдээллээр Солонгосын Засгийн газрын бондууд энэ онд үндэсний мөнгөн тэмдэгтээр тооцвол 7.5 хувийн алдагдал хүлээсэн нь судалгаанд хамрагдсан 44 зах зээлээс хамгийн муу үзүүлэлт болжээ.
Үүний зэрэгцээ Японы эдийн засгийн эхний улирлын өсөлтийн үзүүлэлт 2.1 хувиас 1.8 хувь болгон буурч шинэчлэгдсэн байна. Гэсэн хэдий ч бодит цалин дөрөв дэх сардаа дараалан өссөн нь Японы Төв Банк бодлогын хүүгээ нэмэгдүүлэх боломжийг хадгалсаар байгааг харуулж байна.
Хөрөнгө оруулагчид одоо АНУ-ын инфляцын мэдээлэл болон төв банкуудын дараагийн шийдвэрүүдийг анхааралтай ажиглаж байгаа бөгөөд эдгээр нь дэлхийн технологийн хувьцааны чиг хандлагыг тодорхойлох гол хүчин зүйл болох төлөвтэй байна.
3. АНУ-ын хөдөлмөрийн зах зээлийн хүчтэй үзүүлэлт ХНС-ийн бодлогын хүлээлтийг өөрчиллөө
АНУ-ын хөдөлмөрийн зах зээл хүлээлтээс хавьгүй хүчтэй хэвээр байгааг харуулсан сүүлийн статистик мэдээллүүд санхүүгийн зах зээлүүдийн бодлогын хүүгийн талаарх төсөөллийг эрс өөрчиллөө.
Тавдугаар сард АНУ-ын хөдөө аж ахуйн бус салбарын ажил эрхлэлт 172 мянгаар өссөн нь шинжээчдийн таамаглаж байсан 88 мянган ажлын байрны өсөлтөөс бараг хоёр дахин өндөр үзүүлэлт болсон байна. Үүний зэрэгцээ дөрөвдүгээр сарын ажлын байрны сул орон тоо 7.62 саяд хүрч, 2024 оноос хойших хамгийн өндөр түвшинд хүрчээ.
АНУ-ын Холбооны Нөөцийн Системийн "Beige Book" тайланд хөдөлмөрийн зах зээл тогтвортой хэвээр байгаа ч инфляцын дарамт нэмэгдэж байгааг онцолсон байна. Үүний үр дүнд зах зээлүүд бодлогын хүү буурах магадлалыг дахин анхааралтай ажиглаж эхэллээ.
Goldman Sachs банк өмнө нь 2026 онд хүү буурна гэсэн таамгаа бүрэн цуцалж, дараагийн хоёр удаагийн 0.25 нэгжийн бууралтыг 2027 оны зургаа болон арванхоёрдугаар сар руу хойшлуулсан байна. Тус банк ажилгүйдлийн түвшин дээд тал нь 4.4 хувь хүрнэ гэж үзэж байгаа нь эдийн засгийн идэвх харьцангуй тогтвортой байгааг харуулж байна.
Энэ нөхцөл байдал бондын зах зээлд хүчтэй нөлөөлж, АНУ-ын 10 жилийн хугацаатай Засгийн газрын үнэт цаасны өгөөж 4.55 хувь, хоёр жилийн хугацаатай бондын өгөөж 4.18 хувьд хүрээд байна. Хөрөнгө оруулагчид Холбооны Нөөцийн дараагийн алхам нь хүү бууруулах бус, харин нэмэгдүүлэх магадлалтай гэж үзэж эхэлжээ.
Энэ долоо хоногт нийтлэгдэх АНУ-ын хэрэглээний үнийн индекс (CPI) нь зах зээлийн дараагийн чиглэлийг тодорхойлох гол үзүүлэлт болох төлөвтэй байна.
Дүгнэлт: Геополитикийн хурцадмал байдал удаан хугацаанд үргэлжилж буйтай холбоотойгоор олон улсын инфляцын дарамт шинжээчдийн хүлээлттэй нийцэн өндөр түвшинд хадгалагдаж байна. Үүний үр дүнд дэлхийн томоохон төв банкнууд хатуу мөнгөний бодлогоо үргэлжлүүлэх суурь нөхцөл бүрдэж, олон улсын зах зээлд бодлогын хүү удаан хугацаанд өндөр түвшинд хадгалагдах магадлалыг нэмэгдүүлэв. Ийм орчинд компаниудын санхүүжилтийн зардал өсөх бөгөөд өндөр өрийн хөшүүрэгтэй, жижиг зах зээлийн үнэлгээтэй болон эрсдэл өндөртэй салбарын компаниудын хувьцаа хамгийн түрүүнд дарамтад орох хандлагатай байна.
Мөн AI-тай холбоотой компаниудын хувьцааны үнэлгээ сүүлийн саруудад огцом өссөнтэй холбоотойгоор зах зээл сөрөг мэдээлэлд хэт эмзэг болсон байгааг харуулж байна. Broadcom компанийн тайлан зах зээлийн өндөр хүлээлтэд хүрээгүй нь AI салбарын үнэлгээ хэт халсан байж болзошгүй гэсэн болгоомжлолыг өдөөж, технологийн хувьцаануудад өргөн хүрээний засвар хөдөлгөөнийг бий болгожээ.
Түүнчлэн дөрөвдүгээр сараас хойш AI-тай холбоотой хувьцаанууд макро эдийн засгийн суурь нөхцөлөөс үл хамааран богино хугацаанд хүчтэй өссөн тул зарим хөрөнгө оруулагчид дөрөв, тавдугаар сард хуримтлуулсан ашгаа хэрэгжүүлж эхэлсэн нь зах зээлийн савлагааг улам нэмэгдүүлэв.
Цаашид хөрөнгө оруулагчдын гол анхаарал дэлхийн томоохон төв банкнуудын бодлогын хүүгийн шийдвэрүүд, мөн АНУ, Иран, Израилын хоорондын геополитикийн нөхцөл байдал, зэвсэгт мөргөлдөөнд төвлөрөх төлөвтэй байна.
