Өнөөдрийн хөрөнгө оруулалт — маргаашийн боломж
How can we help?
Хөрөнгө оруулалтын зөвлөх
Бонд арилжаа
Хувьцааны арилжаа
Санхүүжилт
Түгээмэл асуултууд
Нийтлэлийн агуулга:
Доналд Трамп болон Ираны хоорондын 10 долоо хоног үргэлжилсэн мөргөлдөөнийг зогсоох энхийн хэлэлцээ ахицгүй хэвээр байна. АНУ Ираны хамгийн сүүлийн саналыг “бүрэн хүлээн зөвшөөрөх боломжгүй” гэж мэдэгдсэн бол Иран цөмийн байгууламжаа буулгах шаардлагыг дахин няцаажээ.
Иран баяжуулсан ураныхаа тодорхой хэсгийг гуравдагч улсад шилжүүлэх, үлдсэнийг нь баяжуулалтаа багасгах санал гаргасан ч хэлэлцээ бүтэлгүйтвэл уранаа буцаан авах баталгаа шаардсан байна. Мөн АНУ-ын газрын тосны хориг, Оманы булан дахь бүслэлтийг цуцлах, царцаасан хөрөнгийг суллах, Ормузын хоолойн хяналтыг Иранд үлдээхийг хүсжээ.
Трамп Ираныг олон жилийн турш АНУ-тай “тоглоом хийсэн” хэмээн буруутгаж, шаардлагатай бол дарамтаа нэмэгдүүлэх дохио өгсөн байна. Гэсэн ч тэрээр АНУ-д шатахууны үнэ өсөж, улс төрийн дарамт нэмэгдэж буй энэ үед мөргөлдөөнийг хурдан дуусгах сонирхолтой байгаа аж.
Энэхүү хурцадмал байдал дэлхийн зах зээлд нөлөөлж, Brent газрын тосны үнэ 3.5%-иар өсөж баррель нь 104 ам.доллароос давсан бол АНУ-ын фьючерсүүд буурсан байна. Дайн Ойрхи Дорнодод олон мянган хүний аминд хүрч, дэлхийн эрчим хүчний зах зээлд томоохон савлагаа үүсгээд байна.
Доналд Трамп Ираны энхийн шинэ саналыг “бүрэн хүлээн зөвшөөрөх боломжгүй” гэх мэдээний дараа ам.долларын ханш өссөн бол хөрөнгө оруулагчид өнгөрсөн долоо хоногийн огцом өсөлтийн дараа ашиг хамгаалах байр суурь руу шилжиж магадгүй байна. Өнгөрсөн долоо хоногт S&P 500 болон Nasdaq 100 индексүүд шинэ дээд түвшинд хүрч, чип үйлдвэрлэгчдийн хувьцаа 11%-иар өссөн байна. Гэвч Barclays болон Goldman Sachs-ийн стратегичид momentum төрлийн хувьцаануудын үнэлгээ хэт өндөр түвшинд хүрч, залруулга гарах эрсдэл нэмэгдэж байгааг анхааруулжээ.
Ормузын хоолойн нөхцөл байдал хөрөнгө оруулагчдын гол анхаарал хэвээр байгаа бөгөөд Катарын LNG тээвэрлэгч танкер тус хоолойгоор амжилттай нэвтэрсэн нь тээвэр хэсэгчлэн сэргэх боломж байгааг харуулсан байна.
Мөн АНУ-ын инфляц өндөр хэвээр байх төлөвтэй байгаа бөгөөд ирэх долоо хоногт гарах CPI тайлан хэрэглээний үнийн өсөлт үргэлжилж байгааг харуулж магадгүй байна. Холбооны Нөөцийн Сан одоогоор бодлогын хүүг тогтвортой хадгалах төлөвтэй ч эрчим хүчний үнийн өсөлтөөс шалтгаалан цаашид мөнгөний бодлого чангарах эрсдэл байгааг PIMCO-ийн мэдээллийн ахлах ажилтан Дэн Ивасцин онцолжээ.
2. Трампын Хятадад хийх айлчлал
Доналд Трамп энэ долоо хоногт Хятадад төрийн айлчлал хийх нь албан ёсоор батлагдсан бөгөөд тэрээр 5-р сарын 13–15-ны хооронд Ши Жиньпинтэй Бээжин хотноо уулзана. Энэ нь АНУ-ын ерөнхийлөгчийн сүүлийн 10 жилийн хугацаан дахь анхны төрийн айлчлал болох юм.
Айлчлал нь Ирантай холбоотой дайны нөхцөл байдал үргэлжилж буй үед зохион байгуулагдаж байгаа бөгөөд Ираны асуудал уулзалтын гол сэдвүүдийн нэг байх төлөвтэй байна. Хятад улс Ираны томоохон газрын тос худалдан авагч бөгөөд дипломат дэмжигчдийн нэг учраас АНУ-Хятадын харилцаанд сүүлийн үед хурцадмал байдал нэмэгдсэн байна. АНУ Ираны нефть боловсруулсан Хятадын хэд хэдэн боловсруулах үйлдвэрт хориг тавьсан бол Бээжин компаниуддаа АНУ-ын хоригийг үл тоомсорлох чиглэл өгчээ.
Хоёр тал мөн Ормузын хоолойг дахин бүрэн нээх асуудлыг хэлэлцэх бөгөөд Хятад Иранд нөлөөлөх эсэх нь анхаарал татаж байна. Үүнээс гадна худалдааны эвлэрлийг сунгах, ховор металлын нийлүүлэлт, Boeing онгоц, шар буурцаг, AI хагас дамжуулагчийн худалдааны асуудлууд хэлэлцэгдэх төлөвтэй байна.
Мөн Тайванийн асуудал чухал сэдэв байх бөгөөд Бээжин АНУ-аас Тайванийн тусгаар тогтнолыг дэмжихгүй гэсэн байр суурийг илүү тодорхой болгохыг хүсэж магадгүй гэж шинжээчид үзэж байна. Айлчлалын үеэр АНУ-ын бизнесийн томоохон төлөөлөгчид оролцож, худалдаа болон хөрөнгө оруулалтын хэд хэдэн хэлэлцээр байгуулагдах хүлээлттэй байна.
3. Хятад болон АНУ-ын эдийн засгийн үзүүлэлтүүд
Хятадын үйлдвэрийн үнийн индекс (PPI) 2026 оны 4-р сард өмнөх оны мөн үеэс 2.8%-иар өссөн нь цар тахлаас хойших хамгийн өндөр өсөлт болжээ. Энэ өсөлт нь голчлон Ирантай холбоотой дайнаас үүдсэн эрчим хүч, түүхий эдийн үнийн өсөлттэй холбоотой байна.
Хэрэглээний үнийн индекс (CPI) мөн хүлээлтээс давж 1.2%-д хүрсэн бол юанийн ханш ам.долларын эсрэг чангарч, 1 ам.доллар нь 6.8 юаниас доош түвшинд хүрсэн байна. Харин Хятадын урт хугацаат бондын үнэ буурчээ.
Үйлдвэрлэлийн өртөг өссөн ч дотоодын эрэлт сул хэвээр байгаа тул компаниуд нэмэгдсэн зардлаа хэрэглэгчдэд бүрэн шилжүүлж чадахгүй, улмаар ашгийн дарамт нэмэгдэж байна. Үйлдвэрүүдийн худалдан авах өртөг 3.5%-иар өссөн нь борлуулалтын үнээс хавьгүй хурдан өссөн үзүүлэлт болжээ.
Сүүлийн жилүүдэд дефляцийн дарамтад байсан Хятадын эдийн засагт энэ өсөлт тодорхой хэмжээнд сэргэлтийн дохио болж байгаа ч хөдөлмөрийн зах зээл сул, дотоодын эрэлт хангалтгүй хэвээр байна. Металл олборлолт, газрын тос боловсруулах, химийн үйлдвэрлэл болон электроникийн салбарууд үнийн өсөлтийн гол нөлөөг үзүүлжээ.
АНУ-ын 2026 оны 4-р сарын хөдөлмөрийн зах зээлийн тайлан хүлээлтээс давсан эерэг үзүүлэлттэй гарлаа. Тус сард нийт 115 мянган ажлын байр шинээр нэмэгдсэн бөгөөд өмнөх сарын өндөр өсөлттэй нийлээд сүүлийн хоёр жилийн хамгийн хүчтэй хоёр сарын өсөлтөд тооцогдож байна. Үүний зэрэгцээ ажилгүйдлийн түвшин 4.3%-д тогтвортой хадгалагдсан нь хөдөлмөрийн зах зээл Ираны дайнаас үүдэлтэй эрчим хүчний үнийн өсөлт, инфляцын дарамтыг үл харгалзан харьцангуй тогтвортой байгааг харууллаа.
Ажлын байрны өсөлтийг эрүүл мэндийн салбар голлон дэмжсэн бөгөөд тээвэр, агуулах, жижиглэн худалдааны салбарууд мөн хүчтэй нэмэгдэл үзүүлжээ. Ялангуяа хүргэлт, шуудангийн үйлчилгээний ажлын байр 2020 оноос хойших хамгийн өндөр хэмжээгээр өссөн байна. Мөн барилга болон аялал жуулчлал, үйлчилгээний салбарууд хоёр дахь сардаа дараалан өсөлттэй гарсан нь эдийн засгийн идэвх сэргэж байгааг илтгэв.
Харин технологийн салбарт эсрэг дүр зураг ажиглагдлаа. Meta, Microsoft зэрэг томоохон технологийн компаниуд хиймэл оюуны өндөр зардлаа нөхөх зорилгоор ажилтнуудаа цомхотгож байгаа бөгөөд мэдээллийн салбарын ажил эрхлэлт 16 дахь сардаа дараалан буурсан байна. Үйлдвэрлэлийн салбарын ажил эрхлэлт мөн бага зэрэг буурчээ.
Нөгөө талаас хөдөлмөрийн зах зээлд ажиллах хүчний оролцооны түвшин 61.8% болж буурсан нь 2021 оноос хойших хамгийн доод түвшин болов. Мөн өргөн хүрээний ажилгүйдлийн үзүүлэлт 8.2% хүртэл өссөн байна. Гэсэн ч дундаж цагийн цалин жилийн дүнгээр 3.6%-иар өссөн нь өрхийн орлогыг дэмжиж байгаа эерэг үзүүлэлт болжээ.
Энэхүү тайлан нь АНУ-ын эдийн засаг одоогоор харьцангуй тогтвортой хэвээр байгааг харуулсан бөгөөд Төв банк (Fed) бодлогын хүүгээ ойрын хугацаанд тогтвортой хадгалах боломжтой гэсэн хүлээлтийг нэмэгдүүллээ. Гэхдээ Ираны дайнаас үүдэлтэй газрын тос, эрчим хүчний үнийн өсөлт инфляцын дарамтыг нэмэгдүүлж байгаа нь цаашдын хамгийн том эрсдэл хэвээр байна.
