Судалгаа
Өнөөдрийн хөрөнгө оруулалт — маргаашийн боломж
Хураангуй
2026 он гэхэд дэлхийн хиймэл оюуны салбарын өрсөлдөөн үндсэндээ хоёр компанийн эргэн тойронд төвлөрч байна. Эдгээр нь OpenAI болон Anthropic юм. Тус хоёр компани 2025 оны эхнээс хойш нийт $220 тэрбумаас давсан хөрөнгө татаж, тус бүр ойрын хугацаанд IPO хийхээр бэлтгэж байна.
Anthropic хамгийн сүүлийн санхүүжилтийн шатандаа $965 тэрбумын үнэлгээнд хүрч, анх удаа OpenAI-ийн үнэлгээг давсан бол OpenAI хэрэглэгч төвтэй экосистем байгуулж, ChatGPT-ийг “AI superapp” болгон хөгжүүлэх стратегид шилжиж байна. Энэхүү өрсөлдөөн нь зөвхөн хэлний загваруудын чанараар бус, байгууллагын хэрэглээ, үүлэн тооцооллын түншлэл, орлогын өсөлт, хөрөнгө босголтын чадавхаар тодорхойлогдох болсон.
1. OpenAI: Хэрэглэгчийн зах зээлийг эзэлсэн аварга
2015 онд байгуулагдсан OpenAI нь ChatGPT, GPT-4o, o1 reasoning model болон Sora зэрэг бүтээгдэхүүнээрээ generative AI-ийн хамгийн танигдсан брэнд болж чадсан.
ChatGPT нь дэлхийн хамгийн өргөн хэрэглэгчтэй AI платформ болсон бөгөөд OpenAI-ийн өрсөлдөх давуу тал нь технологиос гадна брэндийн хүч, хэрэглэгчийн экосистемд оршиж байна. Компанийн стратеги нь үндсэн загваруудыг API хэлбэрээр түгээж, илүү өндөр ашигтай байгууллагын үйлчилгээ болон платформын орлого бий болгоход чиглэж байна.
Microsoft-той байгуулсан түншлэл нь OpenAI-ийн хамгийн том давуу тал байсаар ирсэн. Гэвч компанийн өсөн нэмэгдэж буй хэмжээ нь Microsoft-оос хараат байдлаа бууруулах шаардлагыг бий болгож байна. Үүний хүрээнд Google Cloud, Oracle болон бусад дэд бүтцийн үйлчилгээ үзүүлэгчидтэй хамтын ажиллагаагаа өргөжүүлж эхэлжээ.
2. Anthropic: Байгууллагын зах зээл дэх хамгийн хүчтэй өрсөлдөгч
2021 онд OpenAI-ийн хуучин удирдлагуудын байгуулсан Anthropic ердөө 5 жилийн дотор дэлхийн хамгийн өндөр үнэлгээтэй хаалттай технологийн компаниудын нэг болж чадсан.
Claude model family (haiku, sonnet, opus) нь байгууллагын хэрэглээнд чиглэсэн шийдлүүдээрээ ялгардаг. Эдгээр нь AWS, Google Cloud, Azure зэрэг олон платформ дээр зэрэг ажиллах боломжийг бүрдүүлдэг. Ялангуяа програмчлалын агентууд болон автоматжуулалтын шийдлүүд нь компанийн орлогын гол эх үүсвэр болоод байна.
3. Стратегийн түншлэл, хамтрал
OpenAI нь тооцооллын хүчин чадал болон дэд бүтцээ өргөжүүлэх хүрээнд доорх томоохон технологийн компаниудтай стратегийн түншлэл байгуулан ажиллаж байна.
Anthropic нь байгууллагын хэрэглэгчдэд чиглэсэн стратегиа дэмжих зорилгоор дэлхийн тэргүүлэх үүлэн үйлчилгээ үзүүлэгчид болон институцийн хөрөнгө оруулагчидтай өргөн хүрээний хамтын ажиллагаа хөгжүүлж байна.
4. Гол хөрөнгө оруулагчид
OpenAI нь үүсгэн байгуулагдсанаасаа хойш нийт $155 тэрбум орчим, харин Anthropic ойролцоогоор $120 тэрбумын хөрөнгө оруулалтыг хаалттай санхүүжилтийг үе шаттайгаар татан төвлөрүүлээд байна. Энэхүү хөрөнгө оруулалтууд нь хоёр компанийн AI загвар хөгжүүлэлт, дата төвийн дэд бүтэц болон тооцооллын хүчин чадлыг өргөжүүлэхэд чиглэж байгаа юм. Доорх хүснэгтүүдэд хоёр компанийн томоохон хөрөнгө оруулагчид болон тэдгээрийн хөрөнгө оруулалтын мэдээллийг харуулав.
5. Орлогын өсөлт: Anthropic түрүүлж эхэлж байна уу?
Хоёр компанийн өрсөлдөх чадварыг үнэлэхэд хамгийн чухал үзүүлэлтүүдийн нэг нь орлогын өсөлтийн хурд юм. OpenAI нь ChatGPT, API болон AI агентуудын экосистемдээ тулгуурлан хэрэглэгчийн зах зээлд тэргүүлэх байр сууриа хадгалж байгаа ч орлогын өсөлтийн хурд нь аажмаар саарч эхэлсэн шинж ажиглагдаж байна. Түүнчлэн судалгаа, хөгжүүлэлт болон тооцооллын дэд бүтцэд шаардагдах өндөр зардлын улмаас ойрын жилүүдэд их хэмжээний мөнгөн урсгалын алдагдал хүлээх төлөвтэй байна.
Харин Anthropic нь байгууллагын хэрэглэгчийн зах зээлд эрчимтэй байр сууриа тэлж, томоохон байгууллагын харилцагчдын тоо богино хугацаанд огцом өссөнөөр орлогын өсөлтөөрөө зах зээлийн анхаарлыг татаж байна. Үүнд Amazon болон Google-ийн түгээлтийн сувгийн дэмжлэг чухал нөлөө үзүүлж, орлогын өсөлтийг улам хурдасгасан бөгөөд Claude Code бүтээгдэхүүн нь богино хугацаанд компанийн томоохон орлогын эх үүсвэрийн нэг болжээ. Гэсэн хэдий ч төрийн байгууллагуудтай холбоотой орлогын төвлөрлийн эрсдэл тодорхой хэмжээнд хадгалагдсаар байна.
2026 оны II улирлын байдлаар Anthropic компанийн орлого $10.9 тэрбумд хүрч, үйл ажиллагааны ашиг анх удаа эерэг үзүүлэлттэй гарснаар $559 саяд хүрээд байна.
> Тайлбар: Орлогын харьцуулалтыг олон нийтэд нээлттэй байгаа мэдээлэлд үндэслэн харьцуулав. OpenAI болон Anthropic нь одоогоор хаалттай компани тул санхүүгийн мэдээллээ хараахан олон нийтэд ил болгоогүй байна. Confidential S-1 filing олон нийтэд нээлттэй болмогц бид компаниудын санхүүгийн нарийн мэдээллийг дэлгэрэнгүй хүргэх болно.
6. IPO
2025 оны сүүлээс эхлэн OpenAI болон Anthropic компаниуд IPO хийхээр бэлтгэж байгаа талаар зах зээлд мэдээлэл түгэж эхэлсэн. Үүний дараа 2026 оны 6 дугаар сард хоёр компани хоёулаа АНУ-ын Үнэт цаас, биржийн хороонд (SEC) IPO хийх хүсэлтээ нууц журмаар гаргаж, олон нийтэд нээлттэй болохоос өмнөх шатны S-1 бүртгэлийн материалыг (confidential S-1 filing) хүргүүлсэн.
OpenAI-ийн хувьд Microsoft-той байгуулсан стратегийн түншлэл, гэрээний нөхцөлтэй холбоотой асуудлууд IPO хийх хугацааг хойшлуулах эрсдэлийг нэмэгдүүлж байгаа бол Anthropic-ийн хувьд үйл ажиллагаа төлөвлөгөөний дагуу үргэлжилбэл хамгийн эртдээ 2026 оны 10-р сард IPO-оо эхлүүлэх боломжтой гэж үзэж байна.
7. Гол эрсдэлүүд
Тус хоёр компанид ижил төстэй хэд хэдэн томоохон эрсдэл бий.
Дүгнэлт: OpenAI нь ChatGPT-ийг дэлхийн хэмжээний AI платформ болгон хөгжүүлж, хэрэглэгчийн зах зээлд тэргүүлэх байр сууриа хадгалж байгаа бол Anthropic нь байгууллагын хэрэглэгчдийн сегментэд төвлөрсөн стратегийнхаа үр дүнд орлогын өсөлтөөрөө зах зээлийн анхаарлыг татаж эхлээд байна.
Ойрын жилүүдэд хиймэл оюуны салбарын асар өндөр хөрөнгө оруулалт, их хэмжээний мөнгөн урсгалын алдагдал нь компаниудын урт хугацааны үнэлгээнд голлох нөлөө үзүүлэх хүчин зүйлсийн нэг хэвээр байна.
Нөгөө талаас, урт хугацаанд дата төвийн үр ашиг сайжирч, GPU, TPU зэрэг AI-д зориулсан тооцооллын техник хангамжийн хүчин чадал нэмэгдэхийн хэрээр нэгж тооцооллын өртөг буурах боломжтой. Энэ нь илүү өндөр гүйцэтгэлтэй хиймэл оюуны загваруудыг хөгжүүлэх, өргөн хүрээнд нэвтрүүлэх нөхцөлийг бүрдүүлж, салбарын өсөлтийг цаашид дэмжих хүлээлтийг бий болгож байна.
IPO-д бэлтгэж буй эдгээр хоёр компани нь зөвхөн хиймэл оюуны салбарын төдийгүй технологийн салбарын түүхэн дэх хамгийн өндөр үнэлгээтэй олон нийтэд санал болгох хувьцаануудын нэг болох юм. Иймээс IPO хүртэлх хугацаанд компаниудын санхүүгийн үзүүлэлт, бүтээгдэхүүний хөгжил, зах зээлд эзлэх байр суурь, хөрөнгө оруулалтын стратеги болон ижил салбарын өрсөлдөгч компаниудын давуу тал, эрсдэлийг тогтмол ажиглаж байх нь хөрөнгө оруулагчдын хувьд оновчтой хөрөнгө оруулалтын шийдвэр гаргахад чухал ач холбогдолтой юм.